AL CAMPANIN DA CRAVAIANA

Püsè chi ta vart sù car Campanin
i vegn cürios, ma crës la voia
d'anduvinèe l'età di teui sagrin,

i pins ca guà nèe 'n drè quatt-cincëint'agn,
ca tei al psè veggiu da sta Vall
ancòo 'n salüte malgradu i tëinta dagn.

L'é stacghi 'n feuch tremendu 'ntal ses-cëint
al cai da Cravaiana in brsai tütti,
an miraclu sl'è salvassi culla gëint,

brsai ia scricc, vèggi testimuniansi
ansèmma l'archiviu dla cà Parruchial
e 'l tëimp l'é cancialà 'nca j'argurdansi,

chissà cui uperai cun quanta cüra
sarën a stacti drè par fèti bell
Pacà! Nen lassèe l'ann s'na scultüra,

anca sa tei nen da cui impunëint
l'intrecc da sass, saris dal Mastallun
s'anchina a culla Cros, Gloria 'ntal tëimp.

Sti füssi 'n gradu da vulèi
da sëinti, vughi e da parlèe
quanti risposti i vuria savèi,

lu sèu cl'è trist sas tratta 'd ricurdèsi:
ma queuinta fünerai tei vist passèe?
E veggi, giou, masnai, piangi, disperèsi,

quëinta bei pitti? Mignin sal porta infant
purtai dal madrini vastji 'n custüm
gnui a batagèe a pei, da distant

e quëinta boccia? Parti spensierai
sventulant cul poch fagott par salutèe
ma 'ntal cor sa santivu tanaiai

tra 'l dulòo da duvèi lassèe la mari
e'l duver da nèe laurèe, rubèe 'l mastèe
gnìi cà tirèe, par si alla pari.

Quant ca saria bell! Santii 'ncòo l'vos,
i cant d'allegria sla piassa dla Gesa,
cull'urgunin a posta par i spos,

i ritrait che 'l sòo l'é facc an cui mumëint
nissün l'é svilüppaii in ma ricort
che 'ntl'attim chi vart sù t'am fai gnji 'n mëint.

Al salüt mattin e sèi dl' Ave Maria,
iori chi sëgnu 'l tëimp cal torna più
sa spangu 'ntl'aria, grevi 'd nustalgia!